На Алими не му е тешко да патува 30 часа само за да игра за Македонија!

14 март 2025 - 11:44

Македонскиот репрезентативец, Исник Алими, е подготвен машки да го издржи долгиот пат од Кина за да му се приклучи на националниот тим во пресрет на квалификациите за Светското првенство 2026.

Тој ќе патува повеќе од 30 часа од својот клуб Далиан за да биде дел од собирот на жолто-црвената селекција, закажан за во понеделник. Македонија на 22 март гостува кај Лихтенштајн, а три дена подоцна ќе го пречека Велс на арената „Тодор Проески“ во Скопје. Алими, кој беше еден од најдобрите играчи во претходното издание на Лигата на нации и кој е големо засилување во средниот ред на селекцијата на Благоја Милевски, со нетрпение го очекува новиот предизвик и ветува максимална посветеност.

„Благодарам за поддршката. Ме чека долг пат, можеби повеќе од 30 часа лет, но јас ќе бидам таму и ќе го дадам максимумот за Македонија на натпреварите против Лихтенштајн и Велс“, напиша Алими на социјалните мрежи.