Македонија без Костадинов на последните натпревари од Лигата на нации

30 октомври 2024 - 09:26

Македонската фудбалска репрезентација во ноември ги игра последните два меча во Лигата на нации против Летонија и Фарски Острови, а на нив селекторот Благоја Милевски нема да може да смета на Тихомир Костадинов кој повторно се повреди.

Костадинов на еден од тренинзите во својот Пјаст Главице ја обнови старата повреда и според информациите го чека пауза од најмалку три недели.

Собирот на репрезентацијата е за две недели, па така селекторот Милевски ќе треба да бара ново решение бидејќи Костадинов во претходните натпревари добиваше стандардна минутажа.

Ќе потсетием, македонскиот фудбалер пред една година се врати на фудбалските терени откако имаше тешка повреда и две хируршки интервенции поради кои паузираше 19 месеци.