Јаневски по само три ипол месеци и пет порази во низа ја напушта Красава!

28 ноември 2025 - 16:32

Поранешниот македонски селектор, Чедомир Јаневски, повеќе нема да седи на клупата на кипарскиот прволигаш Красава, откако клубот реши да се раздели со македонскиот тренер по серијата од пет порази, која сериозно го загрози опстанокот на екипата во елитата.

Тој го презеде тимот во втората половина од август, но неговиот мандат траеше само три и пол месеци. Иако зад себе има богато искуство на Кипар – работејќи во Неа Саламис, Олимпијакос Никозија, Енозис и Етникос Ахна – овојпат не успеа да го подигне тимот и да обезбеди подобар почеток на сезоната.

Искусниот стратег во минатото ја водеше и македонската репрезентација, во периодот од август 2012 до септември 2013 година, а ги има предводено и Црвена Звезда и Вардар. Красава наскоро ќе назначи нов тренер кој ќе се обиде да ја стабилизира екипата и да го осигура опстанокот во Првата лига на Кипар.