Ангеловски ги одбра фудбалерите за Косово – Пандев е на списокот! (ФОТО)

03 октомври 2020 - 17:33

Без Елиф Елмас, кој е позитивен на коронавирус и со само едно ново име во голманот на Силекс, Даниел Божиновски и двајца повратници Ферхан Хасани и Тихомир Костадинов, македонската фудбалска репрезентација ќе го дочека историскиот полуфинален бараж за пласман на Евро 2020 против Косово во четврток, откако денеска Игор Ангеловски го објави списокот на повикани фудбалери.

Добра вест за Ангеловски е што на списокот го има Горан Пандев, капитенот на македонската селекција, кој поради карантинот во Џенова по експлозијата на зараза со ковид-19 (17 заразени има во тимот), висеше за настап, но штом се наоѓа на списокот, значи дека ќе може да настапи за Македонија.

Ангеловски избра 23 фудбалери и тоа е стандардниот тим со повратниците Хасани и Костадинов, кои ги прескокнаа септемвриските мечеви, а го нема Дејан Илиев меѓу голманите, зашто младиот чувар на мрежата и понатаму го нема решено статусот за новата сезона и засега тренира само со Арсенал. Божиновски, голманот на Силекс добива шанса, откако и Мартин Богатинов, кој минатиот месец влета на местото на Димитриевски е позитивен на коронавирус.

Македонија по мечот со Косово во четврток на Националната Арена „Тодор Проески“ во Скопје (20.45 часот), има уште два меча од втората сезона во Лигата на нации, со Ерменија на гости на 11 октомври (18 часот) и со Грузија во Скопје на 14 октомври (20.45 часот).