Скандалот во Манчестер јунајтед ги погоди и сопругите и девојките на фудбалерите

Според информациите на британските медиуми, за четвртокот вечерта била резервирана цела просторија во италијанскиот ресторан „Чибо“ во Хејл, место кое често го посетуваат фудбалерите на Јунајтед. Сепак, собирот бил откажан во последен момент, откако во клубот се обиделе да го смират незадоволството предизвикано од изјавите на аргентинскиот дефанзивец.

Меѓу оние кои требало да присуствуваат биле Мури Лопез, партнерката на Мартинез, Фер Хокинс, сопругата на Хари Мегваер, и Ана Пињо, сопругата на капитенот Бруно Фернандеш. Според објавените информации, дел од партнерките не биле задоволни од пораката што ја испратил Мартинез, бидејќи неговите критики можеле да се протолкуваат како сомнеж во квалитетот на дел од соиграчите.

Скандалот започна по поразот од Атлетико Мадрид со 0-2 во Лигата на шампионите, кога Мартинез отворено го критикуваше техничкиот директор Џејсон Вилкокс и клупското раководство поради начинот на кој бил составуван тимот. Аргентинецот сметал дека не било направено доволно за да се засили екипата и да се создадат услови за поголеми успеси. По бурните реакции, дефанзивецот се извини за своите коментари, а тренерот Мајкл Карик порача дека случајот е надминат и дека екипата мора да се фокусира на следните предизвици.

И покрај обидите да се стави точка на расправијата, случувањата покажуваат колкав притисок има во клубот од „Олд Трафорд“. Проблемите повеќе не се ограничени само на резултатите и играта, туку се одразуваат и врз атмосферата околу тимот.