Родри даде зелено светло за Барса, последниот збор го има Манчестер Сити

07 август 2026 - 08:57

Барселона е чекор поблиску до едно од најголемите засилувања во летниот преоден рок, откако шпанскиот репрезентативец Родри дал согласност да се пресели на „Камп Ноу“. Според информациите на шпанска „Марка“, играчот ги прифатил личните услови понудени од каталонскиот клуб, а сега останува да се постигне договор со Манчестер Сити околу висината на трансферот.

Родри влегува во последната година од договорот со англискиот шампион, што дополнително ја олеснува позицијата на Барселона во преговорите. Каталонците наводно подготвуваат понуда од околу 45 милиони евра плус бонуси од 15 милиони евра, додека Манчестер Сити се надева на сума од најмалку 60 милиони евра за еден од своите најважни фудбалери.

Според шпанските медиуми, клучна улога во убедувањето на Родри имале тренерот Ханси Флик и спортскиот директор Деко, кои му го презентирале проектот на Барселона и неговата улога во тимот. Играчот веќе дал зелено светло за трансферот, па следниот чекор е договор меѓу двата клуба.

Во трката за потписот на шпанскиот репрезентативец претходно сериозен интерес покажуваше и Реал Мадрид, но Барселона во меѓувреме ја презеде иницијативата и во моментов е фаворит за негов ангажман.

Доколку преговорите со Манчестер Сити завршат успешно, Родри ќе стане едно од најзвучните засилувања на Барселона во последните години и клучна алка во средниот ред на тимот на Ханси Флик.