Новиот стадион на Милан и Интер треба да биде готов до 2030 година

08 ноември 2025 - 12:27

Милан и Интер треба да добијат нов дом, а истиот се очекува да биде готов во 2030 година, иако претседателот на „нераѕурите“, Џузепе Марота покажа загриженост поради италијанската бирократија која може да го забави процесот на реализација на проектот.

Култниот стадион „Сан Сиро“ ќе биде урнат, по што ќе се изгради нов и модерен со капацитет од 71.500 седишта, а целта е стадионот да биде целосно подготвен пред почетокот на Европското првенство (ЕП) во 2032 година.

„Јасно е дека сакаме стадионот да биде готов пред ЕП 2032. Се надеваме дека тоа ќе се оствари, иако планот е градежните работи да бидат завршени до 2030 година“, кажа Марота.