„Миовски сака да биде прв напаѓач на Македонија, Абердин ќе му помогне во тоа“
Миовски летово дојде од МТК во Абердин и одигра три меча на кои даде три гола досега, од кои два против Сент Мирен во триумфот со 4-1, па менаџерот на Донс порача дека македонскиот напаѓач ако реализира пола од шансите во кои ќе влезе – ќе се изнадава голови!
„Тој е момче кое не поставува бројка за цел, а јас од него сакам само да се обидува и да влегува во вистинскиот простор за да проба да реализира што е можно повеќе. Минатиот викенд имаше четири шанси, даде два гола и ако остане на 50 отсто од реализација на шансите – ќе се изнадава голови. Миовски има цел да биде прва 'деветка' на Македонија, да биде стартер и да игра цели мечеви, затоа е тука, тоа сака да го направи, а ние сме тука да му помогнеме во тоа. Бојан сака да го предводи нападот на Македонија константно, а не само да добива повремена шанса и затоа мислам дека шкотскиот Премиершип и Абердин може да му го овозможат тоа, да биде успешен на репрезентативната сцена“, вели Гудвин.
Менаџерот посочи дека цел на Абердин е да го има Миовски неколку сезони и тој да биде еден од главните центарфори во лигата.
„Направивме голема инвестиција во него и мислам дека луѓето веќе сфаќаат зашто тоа го направивме. Утре да го ставиме на трансфер-пазарот, ќе добиеме позитивен поврат на инвестираните пари веќе сега, но ние никаде не брзаме за продажба. Сакам да биде тука неколку сезони, да се бори за 'златната копачка' во следните години и ако во тоа успее тогаш ќе имаме – вин-вин ситуација за двете страни“, додаде менаџерот.