Левандовски му го врати мирот на Чави, Барса убедлива против Виљареал! (ВИДЕО)

20 октомври 2022 - 22:57

Барселона, конечно, им понуди победа во убедливо издание на своите навивачи, откако пред четири дена загуби од Реал во Ел Класико, а пред неполна недела одигра реми со Интер, кое, веројатно, ќе ја елиминира од Лигата на шампионите.

„Боксерска вреќа“ беше екипата на Виљареал, која ја совлада со 3-0 на „Камп Ноу“. Победата беше заработена во седум и пол минути во првото полувреме, со два прекрасни гола на Роберт Левандовски и еден на Ансу Фати. За Левандовски тоа беа голови број 10 и 11 во десетте кола откако игра во Ла Лига, со што е убедливо напред на листата со стрелци. Фати, пак, го прослави третиот сезонски гол.

Со овој триумф Барса го одржа чекорот зад Реал, кој води на табелата со 28 бода, три повеќе од каталонскиот ривал. На третото е Реал Сосиедад со 22, четврти е Атлетико Мадрид со 20, додека вечерашниот противник на Барса, Виљареал е деветти со 15.