Дебакл на Милан од Аталанта, Интер не го искористи подарокот (ВИДЕО)

23 јануари 2021 - 19:57

Актуелниот калчолигашки лидер Милан доживеа вечерва вистински дебакл на свој терен откако Аталанта им нанесе најтежок пораз сезонава победувајќи со 3-0 на „Сан Сиро“, но овој подарок не успеа да го искористи градскиот ривал на „росонерите“ Интер, кој немаше муниција и одигра реми без голови против Удинезе на гости.

Кристијан Ромеро на средина од првиот дем ил го најави шокот на лидерите, а потоа асистираше за третиот гол на Дуван Запата во 77-та минута, откако претходно Јосип Иличиќ од пенал во 53-та практично ја обезбеди победата, по која миланскиот великан ќе остане прв, откако Интер освои само бод во Удине.

„Нераѕурите“ ремизираа без голови и сега само за бод ја намалија предноста на Милан и се најдоа на минус два од градскиот ривал во меч на кој македонскиот репрезентативец Илија Несторовски го отседе мечот на клупата за резерви.

Милан има 43 бода од 19 меча, а Интер 41 од исто толку натпревари, на на двата кикса на миланските клубот најмногу ќе се радува Јувентус, кој сега има шанса да ја намали предноста зашто е моментно шести со 33 бода, но после 17 одиграни меча. Рома со денешниот триумф е трета со 37 бода, а Аталанта со оваа победа на „Сан Сиро“ е четврта со 36, додека Наполи со 34 од 17 меча е петопласиран.