Барселона експресно реагира, ќе го награди Флик за освоената титула

11 мај 2026 - 15:33

Ханси Флик со Барселона вчера стигна до уште една титула во Ла Лига, втора во низа откако го презема клубот во 2024 година, па така во клубот сосема очекувано се и тоа како задоволни од неговата работа.

Германскиот стратег има огромно влијание во клубот откако го наследи Чави Ернандез на тренерската функција и за две сезони освои вкупно пет трофеи.

Во Барселона сакаат што подолго да го задржат на „Камп Ноу“, а преговорите за нов договор траат веќе подолго време. Според најпознатиот фудбалски инсајдер Фабрицио Романо, двете страни веќе постигнале договор.

Овие информации ги потврдува и „Спорт“, од каде што наведуваат дека продолжувањето на соработката е во завршна фаза и конкретен исчекор би можел да се случи веќе следната недела.

Ваквите информации доаѓаат по состанокот меѓу спортскиот директор на каталонскиот клуб, Деко и познатиот агент Пини Захави. Иако главна тема на состанокот била иднината на Левандовски, се разговарало и за продолжувањето на договорот на Флик.

Новиот договор според најавите би имал важност до 2028 година со опција за продолжување на дополнителна година.