Турскиот газда на Гостивар се повлече - поради национализам!?

Иако прексиноќа, по низата небулозни и збунувачки постови на официјалната страница на Гостивар на Фејсбук, објавивме дека може профилот е хакиран, па некој објавува невистини, сепак вистината е дека турскиот инвеститор заминал поради верувале или не - национализам.

Првиот човек не можел да верува дека се случува бура од навреди под секоја објава на социјалните мрежи и тоа поради фактот што тие оделе тројазични - на македонски, албански и на турски јазик.

Откако увидел дека во градот нашироко меѓу приврзаниците на клубот е раширен национализмот, турскиот газда решил да се повлече, тренерот си заминал, а најново е дека Гостивар може и нема да игра со Беса в сабота. Гостиварци, заедно со Вардар беа најголеми фаворити за влез во Првата лига, но сега таа улога ја имаат само црвено-црните.

Има срамежливи најави дека општината ќе застане зад клубот, но и да се случи тоа, обемот на инвестиции би бил далеку од досегашниот, па секако неминовно е заминувањето на голем дел од фудбалерите кои летово потпишаа за клубот.