ФФМ одлучи првенството да заврши на најглупавиот можен начин!

Фудбалската сезона во Макредонија ќе продолжи да се игра од 14 јуни или 21 јуни, откако Фудбалската федерација на Македонија (ФФМ) денеска објави дека е донесена одлука да се игра скратено и тоа со најнебулозен систем – да нема испаѓање од лигата.

ФФМ во петокот по состанокот со прволигашите претстави три сценарија за доигрување и сега го одбира најглупавото решение во кое ќе има бпорба за титулата и за местата во Европа, ама нема да има одење во понизок ранг. Истовремено ФФМ ги прекина натпреварувањата во Втората лига и во третите лиги, но не објави дали ќе има проширѕување на лигата.

Според системот на ФФМ ќе се играат четири кола од третиот круг, а потоа лигата ќе се подели на плејоф и плејаут. Во пшлејофот ќе се разигрува низ пет кола за првото место, како и за места во Европа (второ и трето), додека во плејаутот ќе се игра за семки и кикирики. Купот ќе донесе едно место за Европа, преку скратен систем на полуфиналиња во еден меч и финале. Ако, победникот на Купот веќе има европска виза, тогаш четвртиот ќе оди во Европа..

ФФМ најави дека за двата потенцијални датуми ќе го информира координативниот штаб за справување со Ковид-19, по кој ќе биде утврдено кога точно ќе продолжи сезоната.

„Комисијата за натпреварување во рамки на Фудбалската федерација на Македонија на денешниот состанок донесе предлог одлуки за продолжување на натпреварувачката сезона 2019/2020 од Прва МФЛ која беше прекината во март поради епидемијата COVID-19.

По двата состаноци во „Ќука на фудбалот“ со претставници на клубовите од Прва МФЛ и имајќи ја в предвид епидемиолошката ситуација во државата, одобрувањето за продолжување на натпреварувањето, Комисјата за натпреварување го донесе по препорака и на Институтот за јавно здравје, чии претставници го потврдија здравствениот протокол за враќање на фудбалските екипи од Прва МФЛ на тренинзите и натпреварите со целосна одговорност, враќањето на теренитe да биде максимално сигурно за сите учесници.

Како резултат на неизвесноста која во македонскиот фудбал ја донесе здравствената криза предизвикана од пандемијата COVID-19, во изминатиот период Фудбалската федерација на Македонија имаше цел да направи се што може успешно да се заврши натпреварувањето во Прва МФЛ, пред сѐ од спортски причини, но и затоа што на овој начин праќаме порака со охрабрување до фудбалското семејство - враќањето на фудбалот сигурно е одличен знак дека продолжуваме со секојдневните задачи и обврски, но исто така праќаме силна порака и до УЕФА дека сме успеале да ја избегнеме „црната фудбалска зона“ во која влегоа само неколку држави кои решија да ја прекинат фудбалската сезона, а речиси сите држави од нашиот регион според своите услови ги продолжуваат националните првенства.

Натпреварувачката комисија во ФФМ, заедно со раководството на федерацијата, одговорно и транспарентно, почитувајќи ги препораките на претставниците на клубовите предложи три можни сценарија за завршување на сезоната и донесе одлука првенството да се доигра во скратен систем, односно по предлогот кој беше најприфатлив за повеќето од клубовите во Прва МФЛ.

- Одигрување на четирите преостанати кола од третиот круг, а потоа преминување на одигрување на плеј-оф (првите шест екипи по завршување на третиот круг). Првопласираните три екипи по крајот од плеј-офот се стекнуваат со право на учество во УЕФА европските натпреварувања. Плеј-аут (последно пласираните четири екипи по завршување на третиот круг) БЕЗ ИСПАЃАЊЕ на последните две екипи по крајот од плеј-аут фазата. Одигрување на Купот на Македонија со еден полуфинален натпревар и финален натпревар. Победникот од Купот на Македонија обезбедува пласман во УЕФА европските натпреварувања;

Комисијата за натпреварување во ФФМ ќе предложи продолжување на првенството во термин од 14. до 21. јуни, а за предложените датуми ќе се информираат и во координативниот кризен штаб за обезбедување целосна координација во врска со спречување на внесување и ширење на Корона вирус CoVid-19.

Сите натпревари ќе се играат без присуство на гледачи на стадионите, а ќе биде ограничен и бројот на присутни лица кои ќе бидат дел од организацијата на натпреварите.

Исто така, фудбалерите, стручните штабови и сите други лица вклучени во тимовите, како и официјалните лица на натпреварите се обврзани да го почитуваат здравствениот протокол за одигрување на натпревари.

Екипите од Втора МФЛ нема да го продолжат натпреварувањето од сезоната 2019/2020, а Комисијата за натпреварување препорачува истото да го следат и тимовите од Трета МФЛ, како и останатите пониски лиги“, објави ФФМ.