Директорот малку претера: Хајдук е најголем клуб во кариерата на Ракитиќ

21 јули 2024 - 22:11

Еуфоријата околу трансферот на Иван Ракитиќ изгледа најмногу го зафати спортскиот директор на Хајдук, Никола Калиниќ кој малку претера во својата изјава за време на промоцијата.

Ракитиќ е еден од најдобрите фудбалери во историјата на Хрватска и во својата кариера играше за многу славни клубови. Сепак, Калиниќ смета дека Хајдук е над сите нив.

„Ова е еден од најголемите трансфер во историјата на Хајдук и на Хрватска. Иван играше за големи клубови, освојуваше трофеи, а ова му е најголем клуб во кариерата“, изјави Калиниќ и ги запрепасти сите кои го слушаа.

Хајдук е големо име на Балканот и на просторите на поранешна Југославија, но не може да се спореди со Шалке, Барселона и Севиља кои имаат и меѓународни успеси. Само со Барса, Ракитиќ освои 13 трофеи, вклучувајќи четири во шпанското првенство и еден во Лигата на шампионите во чие финале, во 2015 година токму хрватскиот ас постигна гол.