Мастерс Торонто: Надал го мина Вавринка, сега го чека Чилиќ
Надал беше подобар од Стен Вавринка, во многу атрактивен и возбудлив меч. Во првиот сет и двајцата тенисери пропуштија неколку брејк-шански, се до 12. гејм, кога Надал го надмудри Швајцарецот и му го зеде сервисот за 7-5.
Вториот сет Шпанецот го почна посигурно, со брејк за 2-0, но веднаш потоа ситуацијата се сврте и Вавринка освои четири игри по ред за да поведе со 4-2. Надал се врати дури кога Вавринка сервираше за изедначување, при 5-4, а потоа кога мечот отиде во тајбрејк, Шпанецот беше поуспешен со 7-4.
Негов противник во четвртфиналето ќе биде Марин Чилиќ, кој синоќа со 6-3, 6-2 го елиминира Аргентинецот Диего Шварцман. Со истиот резултат третиот светски рекет, Александар Зверев, беше подобар од Данил Медведев и сега ќе игра со Циципас.
Друга четвртфинална двојка, која се формираше рано утрово е Робин Хасе - Карен Качанов. Холанѓанецот изненадно го совлада домашниот тенисер Денис Шаповалов со 7-5, 6-2, а Качанов го надигра Џон Иснер во два тајбрејка. Последната четвртфинална двојка е Димитров - Андерсон.