Федерер шокира - во јануари се враќа на тениските терени

Тој ќе игра егзибициски натпревар на Австралија Опен следната година, заедно со уште тројца поранешни светски тенисери кои порано биле на првата позиција на АТП листата.

„Мислам дека помина цела вечност откако ја измислив фразата 'Среќен слем' за Австралија Опен и сè уште се смеам кога ќе се сетам на сите моменти што ги доживеав тука. Имаше толку многу емоции на Род Лејвер Арената, радоста да го кренам „Норман“ шест пати, честа да играм пред самиот Род Лејвер, предизвикот да се натпреварувам против моите најголеми ривали и секогаш огромната љубов и поддршка од австралиските навивачи. Враќањето и освојувањето на Австралија Опен во 2017 година е еден од моите најдраги спомени од Гренд слем, а одбраната на титулата во 2018 година беше уште еден сон што се оствари во Мелбурн. Едвај чекам да се вратам и да создадам уште повеќе неверојатни моменти со сите австралиски навивачи“, напиша Федерер.

Овој посебен натпревар ќе се одржи како дел од церемонијата на отворање во јануари. Федерер последен пат играше на Австралија Опен во 2020 година, кога беше елиминиран во полуфиналето од Новак Ѓоковиќ. После тоа, тениската икона мораше да се подложи на повеќе операции на коленото што го држеа надвор од терените со месеци. Конечно ја заврши кариерата во септември 2022 година со 20 гренд слем титули.

Во овој егзибициски натпревар исполнет со ѕвезди, Федерер ќе излезе на терен со уште три икони на белиот спорт: Андре Агаси, Патрик Рафтер и Лејтон Хјуит.