Ристовски: Ако сте спортсмени, нема да изберете претседател со половина празни столчиња!

28 октомври 2020 - 21:52

Пред крајниот избор за претседател на МОК, до присутните на Собранието, во улога на гостин, се обрати Борко Ристовски, голманот на Вардар и советник за спорт во опозициската ВМРО ДПМНЕ.

Тој побара од раководството да покаже сенс и да не дозволи избирање прв човек во ситуација кога речиси половина столчиња во салата се празни, по напуштањето на одреден број членови, пред сѐ тие што ја поддржуваа Александра Војнеска-Зикова во борбата против Даниел Димевски.

„Македонија не заслужува ваков избор за претседател на МОК. Не смеете да си дозволите да бидате со половина празни столчиња, тоа е пораз за сите. Велите дека вашата противничка не ги исполнува условите, ама јас знам дека и вие не ги исполнувате, бидејќи само три години бевте предводник на КФМ во регуларни услови, а другите под блокирана сметка. Жал ми е што легенди како Перо Антиќ, Тодор Гечевски и Наумче Мојсоски се дел од едно ваква фарса. Политиката треба да биде надвор од спортот. Апелирам до сите вас како спортски работници да им дадете шанса и на тие што не се тука“, рече Борко.

Излагањето на голманот на црвено-црните наиде на негодување кај дел од присутните членови, па дури и имаше вербална пресмекта со дел од нив.