Прв успех на Македонците на ЛОИ - се сликаа со Ѓоковиќ! (ФОТО)

21 јули 2021 - 22:50

Како што се наближува официјалниот почеток на Летните олимписки игри (ЛОИ) во Токио (23 јули-8 август), така олимпиското село сѐ повеќе се полни со спортисти од целиот свет, меѓу кои има и големи ѕвезди од калибарот на Новак Ѓоковиќ, кој е во центарот на вниманието каде и да се појави.

Меѓу тие што успеаја да дојдат до најдобриот светски тенисер беа и членови на македонската делегација, кои дури дојдоа и до заеднички фотографии со српскиот ас. Денеска тоа го направија пливачот Филип Деркоски, како и Дарко Костовски, тренерот на таеквондистот, Дејан Георгиевски.

„Си посакавме златни медали со Новак. Поддршка за Деки и Македонија од врвниот светски спортски ас“, напиша Костовски на Фејсбук.

Македонија на ЛОИ во Токио ќе ја претставуваат осум спортисти и тоа пливачите Деркоски и Миа Блажевска-Еминова, атлетичарот Јован Стојоски, потоа Борјан Бранковски во стрелаштво, таеквондистот Георгиевски, каратистката Јована Пулексенија, џудистката Арбреша Реџепи и борачот Могамедгаджи Нуров.