Македонија со 26 спортисти учествува на Специјалната олимпијада во Абу Даби

14 март 2019 - 17:14

Дваесет и шест спортисти од нашата земја ќе учествуваат на Летните олимписки игри на Специјалната олимпијада, кои од денеска до 21 март ќе се одржуваат во Абу Даби. Свеченото отворање ќе биде попладнево со дефиле на стадионот во Спортскиот град на шеикот Заед и со палење на олимпискиот оган на надежта.

Спортистите од нашата земја ќе се натпреваруваат во три дисциплини - пливање на 50 и 100 метри и штафета, атлетика и јунифајд кошарка и ревијално танцување.

“Ние сме подготвени да се претставиме во најдобро светло, да уживаме во искуствата од олимписките натпреварувања, да дадеме се од себе и да ги потврдиме или надминеме досегашните резултати“, изјави Елена Зисовска, водач на делегацијата.

Летните олимписки игри на Специјална олимпијада Абу Даби 2019 се најголемиот спортски настан со хуманитарен карактер на планетата. Учествуваат над 7000 атлети од 190 земји од светот кои ќе се натпреваруваат во 24 спортови. Игрите се одржуваат со поддршка од 20.000 волонтери. Ова се први олимписки игри во регионот на Блискиот Исток.