Финалниот турнир во одбојкарскиот Куп ќе се одржи во Радовиш

02 април 2025 - 15:06

Вкупно осум одбојкарски екипи, односно четири во машка и четири во женска конкуренција ќе се соочат за пехарот во Купот на Македонија, а дуелите ќе се одржат во спортската сала „25 Мај“ во Радовиш.

Финалниот турнир ќе го организира Одбојкарската федерација и општина Радовиш, а куп-програмата ќе почне на 3 април со полуфиналните средби во машка конкуренција.

Бранителот на пехарот Штип УГД во првото полуфинале од 16 часот ќе се соочи со Работнички 71&22, додека Струмица 47&72 во вториот полуфинален меч, од 19 часот, ќе ги измери силите со велешки Борец.

Женските полуфинални дуели се предвидени за 4 април (петок). Наковски Волеј и Фит Фан Волеј се првата полуфинална двојка, која игра од 17 часот, додека второто полуфинале во кое се соочуваат Работнички Скопје и Јанта Волеј КВ е закажано од 20 часот.

В сабота, 5 април во салата „25. Мај“ во Радовиш ќе се одиграат финалните натпревари. Од 16 часот ќе почне финалето во женска конкуренција, додека за 19 часот е закажан мечот за трофејот кај мажите.

Сите натпревари од финалниот турнир од Купот на ОФМ ќе имаат директен пренос на националниот сервис.

КУП НА ОФМ 2025

ПОЛУФИНАЛЕ МАЖИ, ЧЕТВРТОК (03.04.2025)
ШТИП УГД – РАБОТНИЧКИ 71&22 16:00ч.
СТРУМИЦА 47&72 – БОРЕЦ 19:00ч.

ПОЛУФИНАЛЕ ЖЕНИ, ПЕТОК (04.04.2025)
НАКОВСКИ ВОЛЕЈ – ФИТ ФАН ВОЛЕЈ 17:00ч.
РАБОТНИЧКИ СКОПЈЕ – ЈАНТА ВОЛЕЈ КВ 20:00ч.

ФИНАЛЕН ДЕН, САБОТА (05.04.2025)
ФИНАЛЕ ЖЕНИ 16:00ч.
ФИНАЛЕ МАЖИ 19:00ч.