„Двомечот со Бугарија ќе ни покаже каде сме пред дуелот со Грција во Атина!“

28 јули 2025 - 13:16

Машката одбојкарска репрезентација на Македонија денеска отпатува за Софија, каде што ќе одигра два пријателски натпревара против селекцијата на Бугарија, како дел од подготовките за претстојните квалификации за Европското првенство 2026.

Првиот е закажан за утре од 17 часот, додека вториот ќе се одигра на 30 јули напладне - двата меча ќе се играат во салата „Левски“. Селекторот Јошко Миленкоски оцени дека дуелите со Бугарија ќе бидат вистински тест за досега сработеното во првиот микро-циклус од подготовките, кој се одвиваше во Маврово. Според него, овие натпревари ќе помогнат да се увидат добрите страни, но и сегментите кои треба да се унапредат пред почетокот на квалификациите.

„Задоволен сум од интензитетот и ангажманот на играчите во Маврово. Сега фокусот го насочуваме кон техничко-тактичките елементи. Бугарија ќе ни покаже каде сме стабилни, а каде имаме простор за напредок пред пресметките со Грција и Грузија“, изјави Миленкоски пред заминувањето за Софија.

По дуелите во Софија, репрезентацијата ќе продолжи со подготовките во Скопје, каде од 5 до 7 август ќе учествува на меморијалниот турнир „Бранко Хаџи Иљоски – Чајка“, заедно со селекциите на Бугарија и Швајцарија. Првиот официјален натпревар од евро-квалификациите Македонија ќе го одигра на 13 август против Грција во Атина, додека на 17 август ќе ја пречека Грузија во Скопје, со што ќе биде комплетиран квалификацискиот циклус.