Ивановски: Тоа што истрчав 20 минути послабо од мојот најдобар резултат покажува дека нешто ми се случувало

10 август 2024 - 12:12

Македонскиот маратонец Дарио Ивановски го освои 69. место на олимпискиот маратон во Париз со време кое е послабо за околу 20 минути од неговото најдобро во кариерата.

Во неговата прва изјава по трката, Ивановски објасни дека се борел со повреда уште од почетната фаза и дека веројатно тоа е причината за послабото време.

„Почитувани Македонци, би сакал да се заблагодарам за поддршката на овој маратон и во подготовките за овие Олимписки игри. Штом ќе се заврши еден маратон, тоа само по себе е успех. Имав мала повреда на стапалото и коленото кои од шестиот километар што не ми дозволи да продолжам со исто темпо како што почнав.

Сепак, го дадов максимумот, сега следува период на рехабилитација и фокус на следните цели. Веројатно сите, па и јас имавме поголеми очекувања, јас уште верувам дека можев  подобро. Тоа што истрчав 20 минути послабо време покажува дека нешто ми се случувало, а тренинзите пред оваа трка покажуваа дека сум бил подготвен и за подобар резултат од моето најдобро време. Се надевам дека на следните трки ќе го видите стариот Дарио“, рече Ивановски.