Патот до СП за Македонија може да води преку Германија, Хрватска дури и Франција!

Репрезентациите пласирани од шесто до 15. место ќе бидат можни противници на Македонија во тоа второ коло од баражот или т.н. плејоф, со исклучок на Полска (12-то пласирана), која како кодомаќин е директно пласирана. Исвесни се осум од нив: Унгарија, Србија, Чешка, Црна Гора, Русија, Холандија, Германија и Хрватска. Деветтата селекција ќе биде шестопласираната на Еуро 2022, а тоа е поразената од мечот меѓу Норвешка и Франција/Исланд.

Норвешка е сигурна на третото место во групата во Братислава, а вечерашното дерби меѓу Данска и Франција ќе покаже каков ќе биде распоредот во Будимпешта. Ако Данците ја совладаат Франција, Исланд ќе се радува на полуфинале, а „триколорите“ ќе завршат трети во групата, со обврска да играат против Норвешка, за пласман на петтата или шестата позиција на првенството.

Очигледно е дека среќата ќе има огромен удел во судбината на Македонија, бидејќи воопшто не е исто дали ќе ја добиеме Црна Гора или Србија или пак Германија или Франција или Норвешка во баражот. Она што ќе зависи од нашиот национален тим е да го минеме првото коло од баражот во кое ние ќе го имаме притисокот на фаворити. Можните противници во него се Швајцарија, Романија, Грција, Израел, Естонија, Финска, Италија, Фарски Острови и Белгија.

Ждрепката ќе биде влечена викендов, во рамки на затворањето на Европското првенство во Унгарија и во Словачка.