Новиот Вардар го реши европскот првак: Милосављев збесна бранејќи за слатка одмазда за Келн!
Вардарци на најубав можен начин покажаа дека заминувањето на Штербик, Циндриќ, Абутовиќ, Македа, Кањелас, Марсениќ нема толку драстично да се почувствува, па сето тоа го надополнија Дејан Милосављев, Сташ Скубе и останатите во пресметката со европскиот владетел.
Милосављев го имаше мечот на кариерата, збесна бранејќи, бранеше и три напади во пет секунди идо лудило ги доведе домашните ракометари. На крајот собра 17 одбрани и беше несовладлив, а и херој на големата победа на вардарци против Монпелје. Ова беше реванш на Вардар за поразот во полуфиналето во Келн во мај годинава, а дуелот на Монпејле и на Вардар е пресметка на последните два европски шампиони и фантастична најава за новата сезона во која очигледно е дека црвено-црните повторно имаат сериозни амбиции и трета година по ред да играат на завршниот турнир во Келн.
Иако францускиот тим беше апсолутен фаворит, уште од стартот на мечот Вардар покажа дека не е дојден само да одигра, туку во Скопје да донесе голема победа. Па во егал и израмнет меч, најчесто Вардар водеше во првиот дел, најмногу со два разлика во 10-та минута (6-4), но наизменично се менуваа со водство до крајот на полувремето, а Иван Чупиќ донесе предност пред паузата за 12-11. И само што почна вториот дел, Вардар со два гола исчекори на највисоки три, кои ги одржуваше во првата половина од мечот (од 14-11 до 18-15 во периодот), но потоа Францизите полека ја стопија предноста, па дури и успеаа да поведат на средина од вториот дел.
Сепак, Вардар брзо се врати во мечот, брзо го врати водството, пред се предводен од Вуко Борозан, Сташ Кубе и Иван Чупиќ, па од последниот егал 22-22, црвено-црните направија два гола предност и ја задржаа истата. На пет минути пред крајот Чупиќ даде за предност од три разлика (25-22) и сето тоа го одржаа за голем триумф.
Борозан со осум гола од 11 обиди беше прв стрелец, пет гола даде Скубе, максимални шест од шест имаше Чупиќ, а Милосављев брилјираше на голот. Кај Монпелје, Вид Кавтичник даде шест гола од шест обиди и беше најдобар поединец во таборот на европскиот шампион.