Македонската публика сака да се прости со Металург во ЛШ со победа!
Ако ја повторат играта од Украина, македонсите вицешампиони без дилема ќе победат вечерва. Таму игравме 28-28, а во првото полувреме имавме плус девет и оправдано во синиот табор велат дека тоа им е најдобриот меч сезонава.
За да го повторат потребна е концентрација во нападот и организација во одбраната. Тренерот Александар Јовиќ посака 13-14 интервенции на голманите, како ветер в грб за победа, така што јасно е што е потребно - само уште да се оствари.
За тоа се прашува и противникот, а тој нема некои големи резултатски мотиви за вечерва. Второ место е, со 11 бода, четири повеќе од Бешикташ кој овој викенд гостува во Монпелје, што значи практично е пласиран во плејофот за осминафинале. Металург, пак, има пет бода и со победа може да се бори и за третото место во групата, чисто за сопствена сатисфакција.
Минатата сезона Мотор славеше тесно, со 23-21, што е уште еден доказ дека не поминува лесно со Металург. Важното е што сите ракометари се здрави и на располагање, потребно е само да го дадат најдоброто од себе.