Кјелце го истурка Кил и стана фаворит за противник на Вардар!

24 февруари 2018 - 19:22

Во 13. коло на ракометната Лига на шампиони во групата Б, екипата на Кјелце успеа да оствари победа на гостувањето во Германија кај Кил, па сега на дофат им е четвртата позиција, која ќе им овозможи евентуален дуел со актуелниот европски шампион Вардар во четвртфиналето.

Домаќините го отворија подобро натпреварот и имаа неколку пати предност од три погодоци, но Кјелце постојано се враќаше во игра и на полувремето замина со негатива од еден погодок. Во вториот дел гостите имаа фантастична серија од голови, со која отидоа на момент и до максимални пет погодоци предност, но таа се стопи до крајот на само еден, па екипата од Полска триумфираше со 30-29

Кил сега има 15 бода на четвртото место, а во последното коло, ќе има пеколно тешка задача на гости кај големиот фаворит ПСЖ, па постои голема можност до четвртата позиција да стигне Кјелце, кој има 13 бода и подобар меѓусебен скор од „зебрите“, а во наредниот меч ќе се пресмета со Мешков Брест.

Секако, не зависи се од исходот на Кил во наредното коло, туку улога играат и Веспрем, како и Фленсбург, кои исто така имаат по 15 бода, но тие во ова коло играат меѓу себе плус уште по еден натпревар во последното.

Четвртото место од оваа група Б е потенцијален противник на Вардар, само во случај ако црвено-црните го сочуваат првото место во групата А. Тогаш го прескокнуваат осминафиналето и во четвртфиналето играат победникот од четвртото место во групата Б и петтото во групата А (во мопментов Пик Сегед).