Металург почнува на 20 јули: Кастратовиќ се надева дека нема да има проблеми

09 јули 2020 - 10:56

Ракометарите на Металург ги почнуваат подготвките за новата сезона на 20 јули во својата база во „Автокоманда“ во Скопје.

Тренерот Зоран Кастратовиќ се надева дека со актуелната ситуација поради ковид-19 дека тимот нема да има проблеми да ги почне и да ги реализира подготовките.

„Се надевам дека на 20 јули ќе можеме непречено да ги почнеме подготовките за новата сезона. За првите два дена од подготовките се предвидени тестирања и лекарски прегледи, а потоа постепено почнуваме со стандардните тренинзи за физичка и техничко-тактичка подготовка. Во Автокоманда ќе работиме до 30 јули, а потоа до 11 август подготовките ќе ги продолжиме во Маврово“, вели Кастратовиќ.

По оваа почетна фаза на подготовките, Металург ќе настапи на турнирите во Струга и Чехов, Русија, каде преку натпревари треба да ја темпира формата за новата сезона во која ќе се натпреварува во домашното првенство и во новоформираната Лига на Европа.