Покетино има список со желби за Дедо Мраз - бара четири засилувања до Нова година!

Новиот менаџер на Манчестер Јунајтед, Маурисио Покетино, планира сериозна реконструкција и освежување на играчкиот кадар уште во претстојниот зимски преоден рок, откако веќе го доставил списокот со желби до раководството со акцент на ангажирање на лев бек, централен дефанзивец и класичен напаѓач.

Како главна мета за зацврстување на одбраната се посочува стоперот на Евертон, Џеред Брантвајт (24). „Црвените ѓаволи“ и во минатото се обидуваа да го ангажираат, но клубот од Ливерпул ги одбиваше сите понуди. Со оглед на тоа што Брантвајт има важечки договор до 2030 година, Евертон сигурно ќе бара високо обесштетување, а неговата пазарна вредност се проценува на 50 милиони евра.

На листата на Покетино се наоѓаат и двајца фудбалери на Фулам - левиот бек Антони Робинсон (29), чија цена би можела да изнесува околу 20 милиони евра, како и неговиот соиграч Калвин Беси, проценет на 28 милиони евра, кој е исклучително ценет поради способноста да покрива и на левата бековска и на стоперската позиција. За освежување на офанзивната линија, желба на Аргентинецот е Доминик Калверт-Луин (29), кој од 2025 година ги брани боите на Лидс Јунајтед.

Покетино го презема тимот во исклучително тежок момент, наследувајќи го Мајкл Керик на клупата. Манчестер Јунајтед моментално се наоѓа на разочарувачкото 18-то место на табелата во Премиер лигата, односно во зоната за испаѓање. Како дополнителен предизвик, Аргентинецот ќе има вистинско огнено крштевање, бидејќи своето деби на клупата на Јунајтед ќе го има веќе в недела во големото дерби против Ливерпул.