Ако Фабрегас не ги запреше своите фудбалери, Јунајтед ќе ја доживееше судбината на Ленс

05 ноември 2026 - 09:15

Манчестер Јунајтед можеби избегна идентична катастрофа на гостувањето кај Комо благодарение на одлуката на Цеск Фабрегас да ги запре своите фудбалери кога веќе имаа убедлива предност од 4-0. Шпанскиот стратег тогаш побара од своите играчи да го намалат темпото, но подоцна призна дека жали за таквата одлука.

Две недели подоцна, Комо покажа што може да направи кога нема намера да го намалува интензитетот. Италијанскиот тим приреди вистинска голеада на гостувањето кај Ленс, победувајќи со неверојатни 9-1 во четвртото коло од Лигата на шампионите.

Составот на Фабрегас одигра фантастичен натпревар и уште еднаш покажа дека неговиот офанзивен фудбал може да биде исклучително опасен за противниците. Комо имаше предност од 3-0 по првото полувреме, а во продолжението целосно го разби францускиот претставник, постигнувајќи уште шест гола.

„Жалам за последните десет минути, бидејќи јас бев тој што му кажа на тимот да го намали темпото. Имавме уште еден натпревар, а при 4-0 можевме малку да ги контролираме работите. Им кажав на играчите да престанат да трчаат и да останат во средината. Тоа е она за што жалам“, призна Фабрегас по дуелот со Јунајтед.

Сега, по гостувањето во Франција, станува јасно каква голгетерска машина има на располагање шпанскиот стручњак. Комо со победата од 9-1 не само што го забележа еден од најубедливите триумфи во историјата на европските натпреварувања, туку и го израмни рекордот за највисока победа во Лигата на шампионите според гол-разликата.