Нојер денеска може да собори рекорд, стар 19 години

Нојер денеска има 40 години и 204 дена. Со тоа, доколку се најде на голот против Лајпциг, ќе го надмине досегашниот рекордер Бернд Дрехер, кој последен пат настапи за баварскиот гигант во првенството на 19 мај 2007 година, на возраст од 40 години и 198 дена.

Сепак, одлуката за настапот на искусниот чувар на мрежата ќе зависи од неговата здравствена состојба. По ремито 2-2 против Аугсбург, Нојер се пожалил на проблеми со стапалото, поради што го пропушти и натпреварот во Лигата на шампионите против Викинг. Тренерот Винсент Компани потврди дека голманот не тренирал во четвртокот и дека дополнителните процени ќе одлучат дали ќе биде подготвен за дуелот со Лајпциг. Доколку не може да настапи, меѓу стативите се очекува да застане 23-годишниот Јонас Урбиг.

Нојер пристигна во Баерн од Шалке во 2011 година и со текот на времето стана еден од најзначајните фудбалери во поновата историја на клубот. Освои бројни трофеи, меѓу кои и две титули во Лигата на шампионите, а со години важи за еден од најдобрите голмани во светот. Против Лајпциг има и импресивна серија – во досегашните 14 официјални натпревари против овој противник нема ниту еден пораз.

Натпреварот од шестото коло во Бундеслигата е закажан за сабота од 18:30 часот, а Баерн ќе се обиде да стигне до важни бодови во трката за врвот на табелата.

Историска вечер би можел да има и Хари Кејн. Англискиот напаѓач треба да го одигра својот 100. натпревар во Бундеслигата, а во првите 99 постигна неверојатни 101 гол – бројка што претставува рекорд во германското првенство за оваа граница на настапи.