Хрватите во транс поради Македонецот - Несторовски даде четири идентични голови (ВИДЕО)

Искусниот напаѓач уште еднаш покажа дека поседува уникатен и препознатлив фудбалски потпис, откако за период од нешто повеќе од една година успеа да постигне дури четири речиси идентични погодоци, предизвикувајќи огромно воодушевување кај фудбалската јавност и раководството на клубот.

Статистичките податоци за неговиот учинок во тековната натпреварувачка кампања се фасцинантни. На десет одиграни натпревари, Македонецот постигна девет погодоци, од кои седум се реализирани во рамките на првенството. Со оваа висока ефикасност, македонскиот голгетер во просек ја тресе противничката мрежа на секои 78 минути поминати на теренот. Гледано низ призмата на целокупниот престој во хрватскиот клуб, тој има биланс од 24 постигнати гола на 63 официјални настапи.

Одушевени од неговите мајстории на зелениот терен и континуитетот во реализацијата, од таборот на Славен Белупо објавија специјално видео компилирајќи ги сите четири идентични погодоци на македонскиот ас. Видеото беше придружено со емотивна порака посветена на неговата неспорна фудбалска класа.

„Не еднаш, не два или три, туку четири пати! И тоа за нешто повеќе од една година. Мајстор си е мајстор, а класата е вечна! Господинот Илија!“, порачаа од клубот.