Македонија почнува нова етапа во својата историја - првпат во Б-Лигата на нации

Македонија за првпат ќе настапува во Лига Б, а покрај Швајцарија во групата се уште и Словенија и Шкотска. Селекторот Гоце Седлоски на располагање има 28 фудбалери, а по четирите тренинзи пред натпреварот истакна дека е задоволен од работата и односот на репрезентативците. Единствено Николов и Чурлинов нема да можат да настапат.

„Очекуваме голема поддршка од трибините, а наше е да прикажеме добра игра“, порача Седлоски, кој нагласи дека фокусот треба да биде ставен пред сè на играта на македонската репрезентација.

Капитенот Енис Барди очекува полниот стадион да биде дополнителен мотив за неговите соиграчи. Македонија на домашен терен ќе се обиде со добар настап да го започне новиот циклус, во кој амбициите се поврзани со настапите во повисокото ниво на Лигата на нации. Нашите фудбалери ќе бидат пред голем предизвик - да го постигнат првиот гол во 2026 година и под водство на Гоце Седлоски и да дојдат до првата победа откако тој е назначен. Оваа година Македонија играше два меча од баражот за Светското првенство и два пријателски дуели, доживеа три порази и одигра едно реми, но се уште не успеала да ја затресе противничката мрежа.

Од другата страна, Швајцарија во Скопје пристигнува по настапот на Светското првенство во 2026 година, на кое стигна до четвртфиналето. Селекторот Мурат Јакин во новиот циклус ќе има нешто изменет состав, со неколку млади фудбалери кои се на чекор од дебито за сениорската репрезентација.

Швајцарците во Скопје ќе бидат без неколку искусни имиња. По репрезентативната кариера се повлекоа Силван Видмер, Кристијан Фаснахт и Ноа Окафор, додека Гранит Џака, Денис Закарија и Рубен Варгас се меѓу играчите кои поради различни причини нема да бидат на располагање. Дополнително, Брил Емболо ќе го пропушти натпреварот поради суспензија.

Сепак, основата на тимот останува, а Јакин има јасна цел – Швајцарија да се врати во Лига А. Поради отсуството на Џака, се очекува Мануел Аканџи да ја предводи репрезентацијата на теренот во Скопје. За двете селекции ова е почеток на исклучително густ циклус. Македонија и Швајцарија ќе одиграат уште еден меѓусебен натпревар на 6 октомври во Луцерн, а во првото репрезентативно прозорче ќе следат и дуелите со Словенија и Шкотска.