Ден за дерби: Вардар ја пречекува Шкендија на Градски!

На Градски од 17 часот Вардар и Шкендија ќе го почнат првото од четирите лигашки дерби натпревари кои треба да ги одиграат оваа сезона.

Вардарци ја имаат улогата на бранители на трофејот, а Шкендија сака да се врати на тронот од каде беше симната токму од денешниот ривал.

Вардар брзо го заврши европското лето и сега комплетно е фокусиран на домашните обврски, за разлика од Шкендија која денешниот меч го игра меѓу двата натпревари против Хибернијан од квалификациите за Конференциската лига.

И Вардар и Шкендија имаа победнички старт на новата сезона, скопскиот тим славеше над Брегалница, а тетовци беа подобри од Скопје.

Намалената лига носи дури четири меѓусебни натпревари, 12 бодови се во игра, а тоа значи дека овие пресметки на крајот може да се покажат и како пресудни за конечниот исход на табелата.

Вардар ќе ја има предноста на домашен терен и поддршката од навивачите, Шкендија има одличен преоден рок и создаде тим кој има по двајца конкурентни фудбалери на секоја позиција, се очекува неизвесен меч.

Во вториот натпревар се среќаваат Скопје и Струга. Тимот од Автокоманда сака да ги освои првите бодови по враќањето во Првата лига, а стружани целат кон нов триумф по оној против Шкендија Арачиново во воведното коло.

Двата натпревари почнуваат од 17 часот.