Хрватски ватерполист осуден на затвор поради тепачка на – фудбалски меч (ВИДЕО)

13 февруари 2026 - 10:49

Хрватскиот ватерполо репрезентативец, Јерко Мариниќ-Крагиќ, е осуден на шест месеци затвор поради учество во навивачката тепачка за време на Европското фудбалско првенство во Франција во 2016 година, но нема да оди зад решетки доколку пресудата стане правосилна.

Судот одлучи затворската казна да му биде заменета со општествено корисна работа, при што во пресметката е вклучено и времето кое Мариниќ Крагиќ го поминал во притвор по апсењето за време на немирите. Судскиот процес траеше 10 години, а според обвинението на Општинското државно обвинителство во Сплит, Мариниќ-Крагиќ заедно со уште тројца обвинети е прогласен за виновен за предизвикување нереди, вербални и физички напади врз противнички навивачи и редарите, како и за поттикнување насилство преку гестикулации и туркање.

Ватерполистот и останатите обвинети ја негираа вината. Мариниќ-Крагиќ се бранеше дека се обидувал да ги раздвои завојуваните страни и да ја смири ситуацијата, тврдејќи дека дејствувал во самоодбрана. Сепак, судот ја темелеше пресудата врз фотографии и видео-снимки, кои, според образложението, ги побиле неговите наводи. Инцидентот се случил на стадионот во Сент Етјен, во финишот на натпреварот од второто коло меѓу Хрватска и Чешка (2-2), кога хрватски навивачи, меѓу кои и припадници на Торцида, предизвикаа нереди, тепачка и прекин на натпреварот. Меѓу нив се наоѓал и професионалниот ватерполист.

Мариниќ-Крагиќ беше стандарден репрезентативец на Хрватска во ватерполо сè до Олимписките игри во Париз 2024, каде со националниот тим освои сребрен медал.