Шошкиќ уште еднаш најефикасен во големата победа на неговиот Стони Брук!

16 јануари 2026 - 10:33

Еден од најталентираните македонски кошаркари во моментов, Андреј Шошкиќ, одигра клучна улога во новата победа на својот тим Стони Брук Сивулфс, постигнувајќи 20 поени и со кош во самиот финиш ставајќи печат на триумфот против Хофстра (76-71) во НЦАА-лигата.

Македонскиот плејмејкер беше најефикасен во својот тим, повторно предводејќи го во нападот. За 32 минути на теренот реализираше 20 поени, со одличен шут од игра 7/12, од кои 3/6 за три поени, а беше беспрекорен и од линијата за слободни фрлања (3/3). Настапот го заокружи со четири скока и три асистенции. Шошкиќ го отвори натпреварот со првите поени, а во драматичната завршница, на осум секунди пред крајот, погоди за конечна потврда на победата, откако Хофстра се закани со пресврт и од негатива од 13 поени се доближи на само минус три.

Триумфот има дополнителна тежина ако се знае дека Хофстра е второпласирана екипа во конференцијата и на мечот пристигна со серија од осум последователни победи. По овој успех, Стони Брук се искачи на седмата позиција во Костал Атлетик конференција со биланс од 10 победи и 9 порази.