ТФТ ја заврши работата, Кожув и Пелистер остануваат во игра

Во третиот меч од серијата со Чаир, тимотод Тафталиџе славеше како гостин со 70-64 и со максимални 3-0 продолжува во следната фаза. ТФТ го диктираше темпото цел натпревар, во ниеден момент не беше во негатива, а максималната предност изнесуваше 18 поени разлика. Во финишот Чаир се доближи на 64-66, но не успеа да направи пресврт. Зафиров со 14 поени беше најефикасен кај ТФТ, но се истакна и Браун со 10 поени и 12 скока. Мофит со 23 поени беше прв стрелец на Чаир.

За разлика од ТФТ, екипите на Работнички и МКК Куманово не успеаја да направат брејк и да ги завршат своите серии. Пелистер му се одмазди на Работнички за дебаклот во неделата, совладувајќи го со 101-77 за намалување на 1-2, додека Кожув по продолжение го победи МКК Куманово со 90-86.

Четвртите натпревари од сериите се играат во текот на викендот, повторно на терените на Кожув и Пелистер. ТФТ и МЗТ Скопје веќе обезбедија пласман во полуфиналето и ќе ја чекаат разврската на останатите четвртфинални дуели.