Вардар загуби од Црвена Звезда во хуманитарниот меч во Скопје (ФОТО+ВИДЕО)

16 април 2025 - 21:47

Најтрофејниот македонски фудбалски клуб Вардар беше поразен од српскиот шампион Црвена Звезда со 1-3 во хуманитарниот меч одигран во чест на загинатите во трагедијата во Кочани.

Дуарте прв се закани кон голот на „црвено-црните“, но Гачевски беше на висина на задачата, по што Михаил Маневски со прекрасен удар донесе водство на Вардар и голот му го посвети на загинатиот фудбалер Андреј Лазаров.

Ц. Звезда во само неколку минути во финишот на првото полувреме успеа да направи целосен пресврт со погодоците на Илиќ и Катаи. Победата на српскиот гигант ја потврди Слепчевиќ во вториот дел кога реализираше за конечни 3-1.

На стадионот беа присутни околу 25.000 навивачи, а целта на хуманитарниот меч беше да се соберат финасиски средства за настраданите во пожарот во Кочани, каде што животот го загубија 61 лице, а над 150 беа повредени.