Тенисерките загубија од Норвешка и останаа без шанси за промоција во БЏК купот!

08 април 2025 - 15:20

Македонската женска тениска репрезентација претрпе несреќен пораз од Норвешка (1-2) во денешниот меч од второто коло во Ц-групата на Втората Евро-африканска зона во Били Џин Кинг купот, што се одржува во Ларнака (Кипар).

По изедначениот резултат по двата дуели во поединечна конкуренција, победникот се решаваше во мечот во двојки. Македонскиот тандем Лина Ѓорческа и Магдалена Стоилковска добро го отвори натпреварот со водство од 4-1 во гемови, но Норвежанките Улрике Еикери и Малене Хелго направија пресврт, добивајќи го првиот сет со 6-4. Во вториот сет, македонската двојка се врати во игра и го доби сетот со убедливи 6-1. Сепак, во супер-тајбрејкот, Норвежанките поведоа со 4-1 и успеаја да ја задржат предноста, славејќи со 10-5 и носејќи ѝ ја победата на својата репрезентација. Норвешка прва дојде до предност откако Еикери ја совлада Стоилковска со 2-0 во сетови (6-3, 6-2), по што Ѓорческа донесе изедначување за Македонија со убедлива победа над Хелго (6-0, 6-2).

Ова воедно значи крај на надежите за освојување на првото место во групата, кое единствено носи шанса за продолжување на борбата за промоција во повисонк ранг во БЏК-купот. Македонија утре го игра својот трет натпревар од групната фаза против селекцијата на Косово, по што во зависност од резултатот ќе се бори за пласман од 4-6 односно од 7-9 место на ова натпреварување.

ФОТО: МТФ