Сампдорија е пред испаѓање во Серија Ц, клубот ќе го спасува - Роберто Манчини

08 април 2025 - 08:57

Некогашниот италијански репрезентативец, подоцна и селектор Роберто Манчини, по 28 години се враќа во тимот на Сампдорија, но не како тренер, туку во друга функција.

Тој ќе биде во улога на спортски директор, во ситуација кога ситуацијата во клубот од Џенова е никогаш полоша. Долгот изнесува 175 милиони евра и првпат во историјата на Сампдорија ѝ се заканува испаѓање во Серија Ц, имајќи предвид дека во моментов е на 18. место на табелата, а сезонава на 32 натпревара, оствари само шест победи.

Манчини ќе се обиде да ѝ помогне на екипата каде опашки се влечат уште од времето кога претседател беше Масимо Фереро. Клубот едвај доби лиценца да се натпреварува и дури во еден момент му се закануваше ликвидација поради долговите кон поранешните играчи и тренери.

Ќе има промена и на тренерското место кое ќе му припадне на членот на легендарната генерација на Милан, Алберико Евани, а Манчини ќе има одврзани раце да ја врати Сампдорија на старите патеки.