Светските шампиони запрени во Парагвај, Санабрија погоди со „ножички“ (ВИДЕО)

15 ноември 2024 - 07:36

Фудбалерите на Парагвај го приредија најголемото изненадување во натпреварите од квалификациите за Светското првенство победувајќи ја Аргентина со 2-1.

Добро започнаа гостите и први стигнаа до водство со голот на Лаутаро. Но, радоста на Аргентина траеше само десетина минути.  Напаѓачот на Торино Тони Санабрија со „ножички“ го зафати нафрлувањето од Густаво Веласкез, а Мартинез на голот беше немоќен.

Тој гол како да им даде дополнителна мотивација на Парагвајците, па на стартот на вториот дел Диего Гомез стрела за целосен пресврт. Аргентинците се мачеа да создаваат шанси и да го избегнат поразот. Најдобрата ја пропушти Кастељанос кој влезе во супер позиција по додавањето од Меси.

Аргентина и по овој пораз останува на врвот со 22 бода, иако Колумбија може да ги стигне доколку победи вечерва во Монтевидео. Парагвај со победата дојде до шестото место кое гарантира автоматски пласман на Мундијалот.

Изненадување изминатата вечер приреди и Венецуела која успеа да остане непоразена против Бразил одигрувајќи 1-1. Во последниот натпревар Еквадор на домашен терен беше убедлив со Боливија и славеше победа од 4-0.