Стојановски: Да ги завршиме квалификациите барем со победа против Украина

25 јуни 2022 - 12:35

Македонската кошаркарска репрезентација утринава во арената „Борис Трајковски“ во Скопје ги започна подготовките за последните два натпревари од квалификаците за Светското првенство. 

Нашиот тим гостува кај Шпанија на 1.јули, а три дена подоцна ја пречекува Украина. Лидер на подмладениот состав на селекторот Драган Бајиќ ќе биде Војдан Стојановски. 

Нашиот репрезентативец сака да ги заврши квалификациите барем со една победа и тоа против Украина на домашен паркет. 

„Малку сме од искусните што останавме, имаме повеќе млади. Атмосфера секогаш имало и ќе има во репрезентацијата“, вели капитенот. „За натпреварите, Шпанија е со истиот состав кој играше во Македонија. Дали е ‘Б’ или ‘А’ тим, Шпанија е Шпанија, ние ќе дадеме се од себе. Најважно ќе биде да се одигра достојно и против селекција од Евролигата и Еврокупот. Дома, пак, со Украина, сакаме да одиме на победа и да ги завршиме квалификациите барем со една победа. Во овој циклус научивме дека нема слаби репрезентации. Штета што цело време не сме комплетни, поради повреди и отсуство на играчи. Последен пат бевме комплетни на ЕП 2015 во Загреб“, завршува Стојановски.