Охриѓанецот Осман им одржа лекција на големите ѕвезди од Бруклин (ВИДЕО)

21 јануари 2021 - 09:13

Тоа што навивачите на Бруклин нетс со нетрпение го очекуваа изминатиов период, првиот заеднички настап на трите големи ѕвезди на овој клуб, заврши со најмалку посакуваното сценарио – пораз во пресметката со Кливленд кавалирс (135-147).

Кевин Дурент и Џејмс Харден првпат заиграа заедно со Кајри Ирвинг, но тоа не го донесе посакуваниот резултат, за што меѓу главните „виновници“ беше турскиот репрезентативец Џеди Осман, кој е роден во Охрид и кој средбата ја заврши со 25 поени и по седум скокови и асистенции. Јунак на вечерта беше 22-годишниот бек на „коњаниците“, Колин Секстон, кој ги засени ѕвездите на „мрежичките“ со реализација на рекордни во кариерата 42 поени. Учинот е уште поимпресивен ако се знае дека ова беше негов прв меч по паузата од пет натпревари поради повреда.

На спротивната страна, Дурент постигна 38 поени, 12 скока и осум асистенции, Ирвинг уфрли 37 поени, додека Харден забележа трипл-дабл со 21 поен, 10 скока и 12 асистенции.

РЕЗУЛТАТИ: Кливленд – Бруклин 147-135 (прод.), Филаделфија – Бостон 117-109, Индијана – Далас 112-124, Атланта – Детроит 123-115 (прод.), Торонто – Мајами 102-111, Минесота – Орландо 96-97, Хјустон – Феникс 103-109, Голден стејт – Сан Антонио 121-99, Л.А. Клиперс – Сакраменто 115-96.