Картер по 22 години официјално и кажа збогум на кошарката

Неговиот тим Атланта хоукс нема шанси за плејофот па затоа не ни доби покана да игра во „Дизниленд“ за да ја заврши сезоната во НБА-лигата. Последните поени во кариерата Картер ги постигна против Њујорк кога реализираше тројка во поразот на Хоукс од 136-131 во продолжението од Њујорк на 11 март. Лигата потоа беше суспендирана поради коронавирусот.

Картер пристигна во НБА-лигата во 1998 година, кога на драфтот беше избран од Торонто репторс како петти пик. Веднаш ги присвои симпатиите на навивачите со своите игри и заслужено беше прогласен за „Дебитант на годината“. Тој шест пати беше олстар играч во седумте сезони додека го носеше дресот на Репторс, а во 2000 година го освои натпреварот во забивање на Олстар натпреварот. Истата година на Олимписките игри во Сиднеј го изведе можеби и најдоброто забивање на сите времиња на дуелот против Франција.

Од 2004 до 2009 година го носеше дресот на Њу Џерси нетс, потоа по една сезона играше за Орландо, Феникс, три во редовите на Далас, исто толку во Мемфис, а 2017/2018 играше во Сакраменто. Изминативе две сезони беше дел од Атланта.