Шеста победа во седмиот контролен меч: МЗТ Скопје вторпат подобар од романска Крајова!

17 септември 2019 - 19:14

Кошаркарите на МЗТ Скопје дојдоа до шестата победа во седмиот контролен меч во пресрет на новата сезона, откако попладнево вторпат по ред ја совладаа романска Крајова (81-69), на чија клупа седи поранешниот шампионскиот тренер на овој тим, Александар Тодоров.

Натпреварот беше максимално изедначен, а составот од Аеродром клучната предност ја оствари во втората половина од последната четвртина кога со серија 9-0 дојде до првата двоцифрена предност (70-60), која ја задржа до самиот крај.

Американецот Џабари Хиндс со 24 поени, четири асистенции и три скока беше најдобар кај актуелниот македонски шампион, каде што двоцифрен поентерски ефект имаа уште и Марко Симоновски со 17, Дамјан Стојановски со 12 и Бојан Крстевски со 11 поени.

Вчера, МЗТ Скопје ја победи Крајова со 82-72, додека претходно ги совлада Гостивар, Вардар, Сигал Приштина и унгарски Шолнок, а загуби од романска Орадеа.