Леклер сензационален победник во Монца – тактички го надмудри Мекларен!

Возачот од Монако прво стартуваше одлично, па брзо ја искористи „војната“ на тимските колеги од Мекларен за да напредува од третата на втората позиција, а по извесен период да се најде и на лидерската позиција по првичната замена на гумите. Леклер долго време не беше сметан за кандидат за победа и сите очи беа вперени кон Оскар Пјастри и Ландо Норис, но на 15-тина кругови до крајот беше јасно дека тој има мангупска стратегија со едно влегување во боксот, за разлика од останатите со две промени на гумите.

Пјастри и Норис успеаја да го престигнат Карлос Саинц, кој беше на истата стратегија како и клупскиот колега, но не и неговиот „соиграч“ од Ферари, кој иако со стари гуми успеа да издржи до крајот и прв да ја мине целта. Двоецот на Мекларен заврши на второто и на третото место, со тоа што немаше тимска наредба па Пјастри финишира пред Норис, кој е во битка со Макс Верстапен за шампионската титула.

Саинц финишира како четврти, Хамилтон беше петти, додека потоа следуваа Верстапен, Расел, Перез, Албон и Магнусен, сите во кругот возачи кои освоија бодови.