УЕФА се огласи и одговори зошто Арсенал не добил втор пенал (ВИДЕО)

30 април 2026 - 14:14

Фудбалерите на Атлетико Мадрид и Арсенал вчера одиграа нерешено 1-1 во првиот полуфинален натпревар од Лигата на шампиони, двата гола на „Метрополитано“ беа постигнати од пенали, а еден удар од белата точка беше поништен.

Во финишот од натпреварот судијата Дани Макели покажа на белата точка откако Давид Ханцко наводно го згазил Езе во шеснаесетникот. Следуваа силни протести од домашните фудбалери, по што стигна и повик од ВАР, а одлуката беше променета.

Во таборот на Арсенал не го криеја незадоволството ниту по натпреварот, а на крајот реагираше и УЕФА со кратко објаснување.

„Играчот на Атлетико со број 17 не направи прекршок над противникот“, соопштија од УЕФА, без дополнителни детали за самиот процес на донесување на одлуката.

Од друга страна, во Арсенал се убедени дека контактот меѓу двајцата фудбалери бил очигледен и дека Езе бил фаулиран.