Младинците на Победа за С. Ирска ќе патуваат – цел ден!?
Експедицијата од 24 члена до Северна Ирска ќе патува цели 24 часа - ќе тргне на патешествието в понеделник, а се очекува дури во вторник фудбалерите да пристигнат на вистинската дестинација. И во таа авантура за одење и враќање ќе сменат седум авиони и четири автобуси.
Прилепчани в понеделник од Прилеп со автобус ќе одат до скопскиот аеродром, од каде што ќе летаат до Загреб, па до Лондон, а оттаму до Белфаст. Првиот дел од авантурата ќе им заврши со автобус од Белфаст до Колерејн. Во вторник навечер од 20.30 часот ќе го имаат последниот тренинг, а в среда ги чека првата пресметка со противникот.
Враќањето е со еден авион повеќе, па од Колерејн до Белфаст ќе одат со автобус, потоа им следи лет до Лондон, од англиската престолнина до Амстердам, па оттаму до Белград, а од српскиот главен град на крај лет до Скопје. И потоа уште два часа со автобус да се вратат дома.
Реваншот е на 5 октомври поради кој Победа го одложи осминафиналето во Купот против Македонија ЃП за 19 октомври.