Дијамантот е подготвен за борба: Елмас испрати моќна порака до Швајцарците!

Популарниот македонски „дијамант“ потенцираше дека стручниот штаб и фудбалерите се максимално свесни за квалитетот на противникот, кој зад себе има одличен настап на неодамнешното Светско првенство, но цврсто верува во капацитетите на македонскиот состав за остварување на позитивен резултат.

Фокусот на македонскиот табор е целосно насочен кон сопствената игра и тактичката дисциплина. Елмас категорично отфрли секакви шпекулации дека евентуалните проблеми со ограничената минутажа на репрезентативците во нивните матични клубови можат негативно да се одразат на нивниот перформанс во државниот дрес, ветувајќи максимално залагање и огромна мотивација од секој поединец.

„Очекувам тежок натпревар, играме со силна репрезентација и знаеме каде стигнаа ова лето на Мундијалот. Сепак, ние сме максимално спремни и ќе дадеме сè од себе за позитивен резултат. Кога сме тука не гледаме на клупската ситуација. Овде даваме максимум и сигурен сум дека утре ќе извлечеме позитивен резултат“, порача Елмас, ставајќи го националниот интерес пред индивидуалните клупски осцилации.

Покрај очекувањата за самиот натпревар, фудбалерот се осврна и на интеграцијата на новите, млади сили во репрезентативниот ростер. Присетувајќи се на своите почетоци во А-тимот, тој ја истакна огромната важност од безрезервната поддршка која поискусните играчи мораат да им ја пружат на дебитантите.

„Ние бевме млади кога дојдовме, а сега ни е чест да ги пречекаме новите. Знаеме како е кога ќе дојдете првпат тука, на секој му е чест да игра за својата држава. Дури мислам дека и повеќе треба да им даваме шанса на младите да собираат искуство“, заклучи македонскиот репрезентативец, повикувајќи на трпение и верба во новата генерација.

Утрешниот меч ќе се одигра на Националната арена „Тодор Проески“ со почеток од 20.45 часот.