Венгер: Арсенал го загуби духот откако го напушти „Хајбери“

20 јануари 2020 - 09:20

Легендарниот француски тренер Арсен Венгер, кој мина 22 години на кормилот на лондонски Арсенал призна дека „топчиите“ го загубиле духот откако во 2006 година го напуштија својот дом „Хајбери“ и се преселија 500 метри подалеку на супермодерниот „Емирати“.

Венгер беше творец на генерацијата „непобедливи“ која на почетокот на 21-от век доминираше во Премиерлигата и постојано беше кандидат за шампионскиот трон, а во 2006 година стигна и до финалето во Лигата на шампионите. Но, од преселбата од „Хајбери“, Арсенал повеќе од деценија е се помалку конкурентен во англиската Премиерлига, а трофеите се помалку ги има во витрините.

„'Хајбери' беше нешто слично на 'Енфилд', тој стадион имаше посебен дух. И кога се преселивме, никогаш не го најдовме тој дух. Нашиот арсеналов дух си остана на 'Хајбери'. Тој никогаш не се појави, не се реинкарнира. И сето тоа беше од безбедносни причини. Сега поради модерните трендови, трибините не се повеќе исти како што беа, атмосферата е многу поинаква во однос на нашиот 'Хајбери'“, рече Венгер.