Серафимов останува во Унгарија, потпиша нов договор со Фехервар!

09 мај 2024 - 13:41

Македонскиот репрезентативец Никола Серафимов ја продолжи соработката со МОЛ Фехервар и ќе остане во унгарската екипа, но засега не се открива на колку години е потпишан новиот договор меѓу двете страни.

Серафимов го носи дресот на Фехервар од 2022 година, а од клубот соопштија дека им е мило што македонскиот дефанзивец и во иднина ќе ги брани боите на нивниот тим.

„Пристигнав во Фехервар пред две години. Првата сезона не беше најдобра и морав да се соочам со две повреди. Работите се променија на почетокот на оваа сезона и нашиот тим стигна до посакуваната цел. Среќен сум што го продолжив договорот“, кажа Серафимов.

Фехервар по 31 одиграно коло во унгарското првенство се наоѓа на третата позиција со 53 бодови, односно еден помалку од Пакси.